Касцёл Святых Сымона і Алены

Аўдыягід

Апісанне

Касцёл Святых Сымона і Алены. Знаходзіцца ў самым цэнтры Мінска на плошчы Незалежнасці. Яго яшчэ называюць «Чырвоны касцёл», ён пабудаваны з чырвонай цэглы. Фундатарамі былі слуцкі памешчык Эдвард Вайніловіч і яго жонка Алімпія (фундатар – гэта чалавек, па ініцыятыве і на грошы якога вядзецца будаўніцтва якога-небудзь аб’екта). Вайніловічы здзейснілі гэта ахвяраванне ў памяць пра сваіх рана памерлых дзяцей. 3-нефавы 3-вежавы храм у стылі неаготыкі з рысамі мадэрна быў пабудаваны па праекце польскага архітэктара Томаша Пайздзерскага і асвячоны ў 1910 годзе. Вышыня звонавай вежы – 50 метраў, у свой час гэта быў самы высокі будынак Мінска. Месцам, дзе жыве Бог, касцёл быў нядоўга. У савецкі час ён стаў тэатрам, затым – кінастудыяй, Домам кіно. А ў 1990 годзе касцёл, нарэшце, быў вернуты вернікам. На вежах зноў з’явіліся крыжы, а на скляпеннях – роспіс. У 1996 годзе перад уваходам з’явілася скульптура Міхаіла Архангела. У 2000 годзе была ўзведзена мемарыяльная званіца «Звон Нагасакі» ў памяць пра ахвяр Хірасімы, Нагасакі і Чарнобыля. Сёння Чырвоны касцёл – помнік архітэктуры рэспубліканскага значэння, упрыгожванне нашай сталіцы, своеасаблівая візітная картка Мінска. Узрост касцёла крыху больш за 100 гадоў. Для гістарычнай славутасці гэта няшмат. Але, улічваючы жыццёвыя рэаліі, час і падзеі, якія адбыліся з моманту яго заснавання да нашых дзён, можна лічыць цудам той факт, што ён ёсць. Так, ён выстаяў і сёння, як і раней, Чырвоны касцёл – цэнтр духоўнасці, сімвал веры ў жыццё і прыгажосць. І веры ў тое, што, як і раней, «прыгажосць выратуе свет».