Нацыянальны парк «Белавежская пушча»

Аўдыягід

Апісанне

Нацыянальны парк «Белавежская пушча» займае плошчу 150 тысяч гектараў. Ён быў створаны ў 1991 годзе. Гэта адзін з самых тытулаваных запаведнікаў Еўропы, прызнаны эталоннай прыродаахоўнай установай еўрапейскага кантынента. У 1992 годзе ён быў уключаны ў Спіс сусветнай спадчыны ЮНЕСКА, у 1993 годзе яму прысвоены статус біясфернага запаведніка. Белавежская пушча ўнікальная, яна захавала сваё першапачатковае аблічча. У ёй налічваецца больш за 1000 відаў раслін і звыш адной тысячы шматвяковых дрэў-волатаў: 600-гадовы дуб, 350-гадовая хвоя, 200-гадовая елка. Тут адзінае месца ў Беларусі, дзе ў натуральных умовах растуць рэдкія віды: піхта белая і дуб скальны. Белавежскую пушчу называюць «Ноевым каўчэгам», дзе ацалеў еўрапейскі жывёльны свет і сімвал пушчы – зубр, самы буйны прадстаўнік беларускай фаўны. Менавіта захаванне зубра ў свой час клапаціла і літоўскіх князёў, і польскіх каралёў, і пазней рускіх цароў. Таму ў пушчы не толькі палявалі, але і захоўвалі прыроду. У цяперашні час зуброў тут каля 500 асобін. Фаўна нацыянальнага парку налічвае 12 тысяч відаў, з іх 59 відаў млекакормячых, звыш 250 відаў птушак. Больш за 70 відаў жывёльнага свету пушчы занесены ў Чырвоную кнігу Беларусі.
Госці нацыянальнага парку могуць адправіцца на экскурсію па экалагічнай сцежцы «Запаведная дубрава», наведаць Музей прыроды, вальеры, дзе можна ўбачыць зуброў, ласёў, дзікоў, мядзведзяў і іншых насельнікаў пушчы. А яшчэ можна адправіцца ў госці да Дзеда Мароза, які жыве ў адным з маляўнічых куткоў нацыянальнага парку.

Відэа